ठाणे लोकसभा मतदारसंघात शिवसेना-भारतीय जनता पक्ष युतीचे उमेदवार राजन विचारे आणि काँग्रेस-राष्ट्रवादी काँग्रेस आघाडीचे उमेदवार आनंद परांजपे यांनी मोठं शक्ती प्रदर्शन करत आपली नामनिर्देशन पत्रं दाखल केली. आनंद परांजपे यांच्या समवेत गणेश नाईक, संजीव नाईक, जितेंद्र आव्हाड आणि काँग्रेसचे मुझफ्फर हुसेन नामनिर्देशन पत्र दाखल करताना उपस्थित होते. तर शिवसेनेतर्फे नामनिर्देशन पत्र दाखल करताना राजन विचारे यांच्या समवेत माजी महापौर अनंत तरे, नंदिनी विचारे उपस्थित होत्या. ठाणे लोकसभा मतदारसंघात आज ७ उमेदवारांनी १२ नामनिर्देशन पत्रं दाखल केली आहेत तर आत्तापर्यंत ११ उमेदवारांनी एकूण १६ नामनिर्देशन पत्रं दाखल केली आहेत. कल्याण लोकसभा मतदारसंघात आज ७ उमेदवारांनी १६ नामनिर्देशन पत्र दाखल केली आहेत तर आत्तापर्यंत १४ उमेदवारांनी २५ नामनिर्देशन पत्रं दाखल केली आहेत.