ठाण्यात नियमबाह्य रात्रभर सुरू असलेल्या डान्सबार, हुक्का पार्लर प्रकरणी आमदार संजय केळकर यांच्या पाठपुराव्यानंतर राज्याचे गृहमंत्री दिलीप वळसे-पाटील यांनी गृह सचिवांना कार्यवाहीचे निर्देश दिले आहेत तर या प्रकरणी केळकर पुरावेच सादर करणार असल्याने ठाणे पोलिसांचा दिशाभूल करणारा खुलासा त्यांच्याच अंगलट येण्याची शक्यता आहे.
ठाण्यात कोरोना काळातही रात्रभर डान्स बार, हुक्का पार्लर आदी अवैध व्यवसाय सुरू आहेत. याबाबत आमदार संजय केळकर यांनी कारवाईची मागणी केली होती. मात्र शहरात बेकायदेशीरपणे रात्रभर असे धंदे सुरू असल्याचे आढळून आलेले नाही, असा लेखी खुलासा पोलिसांनी केला आहे. शहरातील जागरूक नागरिक या बाबत तक्रारी करत असून या धंद्याचे पुरावे समाज माध्यमांतून प्रसारित झाले आहेत. यावर कारवाई होणे जनतेला अपेक्षित असताना तक्रार करणाऱ्यांवर दबाव टाकला जातो. ठाण्यासारख्या सुशिक्षित शहराच्या प्रतिमेला डाग लावण्याचा हा प्रकार आहे. तक्रारीनंतर एक-दोन ठिकाणी थातूर मातूर कारवाई झाली आणि ते व्यवसाय पुन्हा सुरू सुदधा झाले आहेत. असे असताना ठाणे पोलिसांनी केलेला लेखी खुलासा दिशाभूल करणारा आणि खोटा आहे हेच स्पष्ट होते, असे सांगत आमदार केळकर यांनी उत्पादन शुल्क विभागाने याबाबत एकाही व्यवसायावर कारवाई न केल्याने नाराजी व्यक्त केली आहे.
या अवैध व्यवसायांबाबत आणि पोलिसांच्या भूमिकेबाबत आमदार संजय केळकर यांनी जनहित डोळ्यासमोर ठेवून गृहमंत्री दिलीप वळसे-पाटील यांना लेखी कळवून कारवाईची मागणी केली होती. गृहमंत्र्यांनी गृह सचिवांना याबाबत निर्देश दिले असून अहवाल सादर करण्याच्या सूचना केल्या आहेत. तर केळकर हे देखील याबाबतचे पुरावे गृह विभागाला सादर करणार आहेत.