रुग्णालयात दाखल करुन न घेणाऱ्या तसेच भरमसाठ पैसे उकळणाऱ्या मुंब्र्यातील तीन रुग्णालयांवर महापालिकेनं गुन्हा दाखल केला आहे. मुंब्रा परिसरात कोविड 19 चे रुग्ण वाढत असताना अशा रुग्णांना रुग्णालयात जागा नाही असे सांगून दाखल करुन न घेणाऱ्या, तसेच गरीब आजारी लोकांना आणि प्रसुतीसाठी दाखल होणाऱ्या महिलांकडून भरमसाठ पैसे सांगणाऱ्या मुंब्र्यातील बिलाल रुग्णालय, प्राईप क्रिटीकेयर रुग्णालय आणि युनिव्हर्सल रुग्णालयाबाबत महापालिकेकडे प्राप्त झालेल्या तक्रारीनुसार महापालिका आयुक्त विजय सिंघल यांच्या आदेशानुसार आज गुन्हा दाखल करण्यात आला आहे. या तिन्ही रुग्णालयांमध्ये गरीब आणि आजारी रुग्णांना दाखल करताना, तसेच महिलांना प्रसुतीसाठी दाखल करताना भरमसाठ पैसे भरा असे सांगितले जात होते, तसेच रुग्णालयात बेड शिल्लक असतानाही प्रवेश नाकारला जात असल्याच्या तक्रारी महापालिकेकडे प्राप्त झाल्या होत्या. सध्या कोविड 19 चे रुग्ण वाढत असताना रुग्णांना दाखल करुन घेण्याबाबत रुग्णालयांना विनंती करण्यात आली होती तसेच नोटीसही बजावण्यात आली होती. परंतु गेल्या दोन दिवसात प्राप्त झालेल्या तक्रारीची पडताळणी करुन त्यात तथ्य असल्याचे आढळल्यानंतर या रुग्णालयांवर गुन्हा दाखल करण्याचे आणि सिल करण्याचे आदेश आयुक्तांनी दिले होते. त्यानुसार मुंब्रा प्रभाग समितीचे सहाय्यक आयुक्त महेश आहेर यांनी बिलाल रुग्णालय, प्राईप क्रिटीकेअर रुग्णालय आणि युनिव्हर्सल रुग्णालयाविरोधात मुंब्रा पोलीस ठाण्यात गुन्हा दाखल केला आहे. तसेच प्राईप आणि क्रिटीकेअर या रुग्णालयातील रिक्त रुम महापालिकेच्या वतीने सिल करण्यात आल्या आहेत.