ठाणे महापालिकेतील कर्मचाऱ्यांची सहाव्या वेतन आयोगातील विद्यमान वेतनश्रेणी आणि ग्रेड पे संरक्षित करुन त्याप्रमाणे सुधारित वेतन निश्चित करण्याबाबतचा शासन निर्णय आज प्रसिद्ध झाला. या निर्णयामुळे महापालिकेतील वर्ग 1 ते 4 च्या कर्मचाऱ्यांचा सातवा वेतन करण्याचा मार्ग मोकळा झाला आहे. यामुळे आनंदाचे वातावरण निर्माण झाले आहे. महापालिकेच्या आस्थापनेवर असलेल्या काही पदांच्या वेतनश्रेणी या शासनाकडे असलेल्या वेतनश्रेणीशी समकक्ष आढळून न आल्याने या पदांबाबत शासनाकडे मार्गदर्शन मागविण्यात आले होते. परंतु अनेक दिवसांपासून हा प्रश्न प्रलंबित असल्यामुळे कर्मचाऱ्यांमध्ये नाराजीचे वातावरण होते. कोणत्याही संवर्गाचे वेतन कमी न करता कर्मचाऱ्यांना सातवा वेतन आयोग लागू करावा या मागणीचा फेरविचार करण्याबाबतचा पत्रव्यवहार नरेश म्हस्के आणि नजीब मुल्ला यांनी केला होता. परंतु वर्ग 1 ते 4 मधील प्रलंबित कर्मचाऱ्यांच्या वेतनश्रेणीबाबत निर्णय होण्यास विलंब झाल्याने कर्मचाऱ्यांना सातवा वेतन आयोग लागू होत नव्हता. आज अखेर या मागणीला यश आले असून वर्ग 1 ते 4 च्या कर्मचाऱ्यांना सातवा वेतन आयोग लागू करण्याचा शासननिर्णय आज प्रसिद्ध करण्यात आला.