जेएनयु मधील अन्याय्य शुल्क वाढीविरोधातील आंदोलनाला दडपण्याच्या प्रकरणाचा निषेध करण्यासाठी ठाण्यात सम्यक
विद्यार्थी आंदोलनाच्या वतीनं निदर्शनं करण्यात आली. यावेळी जेएनयु मधील विद्यार्थ्यांच्या वसतीगृह शुल्क वाढीच्या
आंदोलनाला पाठिंबा देणा-या विद्यार्थ्यांवर पोलीसांनी जो अमानुष लाठीमार केला त्याचा निषेध करण्यात आला. सरकारनं
यापुढे पोलीस बलाचा वापर शांततामय आंदोलन करणा-या विद्यार्थ्यांवर करू नये याबाबत कायदा करावा अशी मागणी
यावेळी करण्यात आली. कॅटच्या अहवालानुसार २.१८ लाख कोटींचा निधी शिक्षण आणि स्वच्छतेसाठी जमा करण्यात
आला आहे. त्याचा वापर न करता हा फंड तसाच पडून आहे. हा फंड विद्यापीठात शिकणा-या गरीब मागासवर्गीय
विद्यार्थ्यांच्या शिष्यवृत्त्या, वसतीगृहांचा विकास, पुनर्बांधणी, सफाई यांच्या शिक्षणासाठी वापरावा अशी मागणीही
आंदोलनाच्या वतीनं करण्यात आली. जिल्हाधिका-यांना या आशयाचं निवेदनही यावेळी देण्यात आलं.
