ठाणे महापालिका कार्यक्षेत्रातील वर्तकनगर प्रभाग समितीमध्ये समता नगर येथे शनिवारी (४ मार्च) सिंगल यूज प्लॅस्टिक पिशवी प्रतिबंध मोहिम कारवाई करण्यास गेलेल्या ठाणे महापालिकेच्या पथकावर दुकानदाराने हल्ला केला असून आरोपी बाळाराम देवासी याला वर्तकनगर पोलिसांनी अटक केली आहे. या भ्याड हल्ल्याचा महापालिकेने तीव्र निषेध व्यक्त केला आहे.
शनिवारी दुपारी उपमुख्य स्वच्छता निरीक्षक हेमंत चौधरी यांच्या नेतृत्वाखाली दीपेश मंत्री आणि समीर डोळे हे स्वच्छता निरीक्षक आणि उस्मान खान हा सफाई कामगार यांचे पथक समता नगर भागातील रस्त्यावर पडलेला कचरा, कचरा फेकणारे नागरिक आणि बंदी असलेल्या प्लास्टिक पिशव्यांची तपासणी करत असताना भैरी भवानी सुपर मार्केट या दुकानात प्लास्टिक पिशव्या, प्लस्टिक चमचे आणि इतर बंदी असलेले प्लास्टिक साहित्य या पथकाच्या निदर्शनास आले. त्यांनी दुकानदाराला पाच हजार रुपयांचा दंड करणारी पावती तयार केली. बाळाराम देवाशी यांनी मात्र विरोध करून अधिकाऱ्यांना दमदाटी केली. अधिका-यांनी रस्त्यावर ठेवलेले दुकानातील साहित्य जप्त करण्यासाठी अतिक्रमण विरोधी पथकाला बोलावले असता, बाळाराम देवासी यांनी अधिकाऱ्यांना शिवीगाळ करून कुंडी फेकून मारण्याचा प्रयत्न केला या हल्ल्यात उपमुख्य स्वच्छता निरीक्षक श्री.हेमंत चौधरी यांच्या डोळ्याला दुखापत झाली आहे. याबाबत वर्तकनगर पोलिस ठाण्यात गुन्हा दाखल करण्यात आला आहे.
