ठाण्यातील पहिली स्थानिक वाहिनी असलेल्या श्रीस्थानक वाहीनीने आज आठव्या वर्षात पदार्पण केलं आहे. ठाणे वार्तानं ठाण्यातील सांस्कृतिक, सामाजिक कार्यक्रमांचं प्रसारण व्हावं, स्थानिक कलाकारांना संधी मिळावी या उद्देशानं श्रीस्थानक वाहिनी ही १ नोव्हेंबर २०१३ ला धनत्रयोदशीच्या मुहुर्तावर सुरू केली. आज या वाहिनीला ७ वर्ष पूर्ण झाली आहेत. सुमारे १ हजार वर्षापूर्वी शिलाहार राजांची राजधानी असलेल्या पूर्वीच्या श्रीस्थानकाचा अपभ्रंश होत सध्याचं ठाणे हे नाव आल्याचं इतिहासकारांकडून सांगितलं जातं. ठाण्याचं हे ऐतिहासिक नाव घेऊन श्रीस्थानक वाहिनी सुरू करण्यात आली. सध्या इन केबलच्या ९८५ क्रमांकावर श्रीस्थानक वाहिनीचं दिवसभर प्रक्षेपण सुरू असतं. विशेष म्हणजे कोणत्याही प्रकारचा हिंदी चित्रपट न दाखवता स्थानिक कार्यक्रमांचं प्रक्षेपण गेली ७ वर्ष केलं जात आहे. अशाप्रकारे प्रक्षेपण करणारी ही एकमेव वाहिनी आहे. श्रीस्थानक वाहिनीचं लाईव्ह स्ट्रीमिंगही होत असून ठाणे वार्ता डॉट ईन या संकेतस्थळावर श्रीस्थानकवर क्लीक केल्यास आपण या लाईव्ह स्ट्रीमिंगचा आनंद आपल्या संगणकावर अथवा मोबाईलवरही लुटू शकता. त्याचप्रमाणे श्रीस्थानक डॉट ईन या संकेतस्थळावर आणि फेसबुकवरील श्रीस्थानक या पेजवरही श्रीस्थानक चॅनेलच्या थेट प्रक्षेपणाचा आनंद लुटू शकता. स्थानिक पातळीवर गेली ५ वर्ष लाईव्ह स्ट्रीमिंग करणारी श्रीस्थानक वाहिनी ही राज्यातली एकमेव वाहिनी आहे.