कापूरबावडी पोलीस ठाण्यातील एक आरोपी कोरोनाबाधित झाल्यामुळे या आरोपीच्या संपर्कात आलेल्या 12 जणांना क्वारंटाईन करण्यात आले असुन पोलीस कर्मचाऱ्यांच्याही चाचण्या करण्यात येणार आहेत. कोरोनामुळे पोलीसांवरील ताण वाढत असून सतत येणा-या कोरोना रूग्णांच्या संपर्कामुळे त्यांच्या जिविताचा प्रश्नही निर्माण झाला आहे. विविध पोलीस ठाण्यात घडणाऱ्या गुन्ह्यातील आरोपीना पोलीस सातत्याने अटक करीत असतात. अटक केलेला आरोपी कोरोनाबाधित आढळल्यास त्याच्या संपर्कात आलेल्या पोलीस कर्मचा-यांना कोरोनाचा संसर्ग होण्याची दाट शक्यता असते. त्याचबरोबर आरोपीला न्यायालयात हजर केल्यानंतर न्यायालयातील वकील, सुनावणी करणारे न्यायाधीश हे देखील संकटात सापडण्याची शक्यता बळावत असल्याने पोलीस आणि न्यायालयीन कर्मचारी धास्तावले आहेत.