ठाणे पोलीस आयुक्तालयातील आत्तापर्यंत ७५६ पोलीस कोरोना संक्रमित झाले असून ५९७ पोलीसांनी कोरोनावर मातही केली आहे. कोरोनाशी मुकाबला करताना पोलीसांची कामगिरी महत्वपूर्ण आहे. जीवाची पर्वा न करता गेले तीन ते चार महिने पोलीस कोरोनाशी अहोरात्र लढा देत आहेत. सद्यस्थितीत पोलीस आयुक्तालयातील १५४ पोलीस उपचार घेत असून दुर्दैवानं आत्तापर्यंत ५ पोलीसांना आपले प्राण गमवावे लागले आहेत. तरीसुध्दा हे कोविड योध्दे मोठ्या जिद्दीने कोरोनाचा मुकाबला करत आहेत. यामध्ये त्यांच्या कुटुंबाचाही वाटा मोलाचा असून त्यामुळेच हे योध्दे दिवसरात्र झटत असल्याचं दिसत आहे.