पेट्रोल दरवाढीच्या विरोधात राष्ट्रवादी युवक काँग्रेसच्या कार्यकर्त्यांनी भारतीय जनता पक्षाच्या प्रदेश कार्यालयावर सायकल मोर्चा काढण्याचा प्रयत्न पोलीसांच्या विरोधामुळे अयशस्वी ठरला. पोलीसांनी ठाण्यातच हा मोर्चा अडवून कार्यकर्त्यांना ताब्यात घेतलं. राष्ट्रवादी काँग्रेसच्या पांचपाखाडी येथील कार्यालयापासून सुरू झालेला हा सायकल मोर्चा पोलीसांनी नितीन कास्टींग सिग्नलजवळच अडवला.
पेट्रोल आणि डिझेलच्या दराने उच्चांक गाठला आहे. पेट्रोल-डिझेल नियंत्रणमुक्त केल्यामुळे पेट्रोलियम कंपन्या रोज दरात बदल करत आहेत. पेट्रोलची मूळ किंमत कमी असताना जास्त दराने विक्री करून लूट केली जात आहे. रोज दरवाढ करण्यापेक्षा तीन महिन्यातून एकदा दरामध्ये फरक करावा, पेट्रोल-डिझेलचे इतर कर काढून वस्तू आणि सेवा कराच्या कार्यकक्षेत घ्यावे अशा मागण्या करण्यात आल्या असतानाही त्याकडे दुर्लक्ष केले जात आहे. पंतप्रधानांना याबाबत आंदोलनाची निवेदनं पाठवूनही त्याची दखल घेतली जात नसल्यामुळं आता भारतीय जनता पक्षाच्या प्रदेश कार्यालयावर सायकल मोर्चा नेऊन प्रदेश कार्यालयात माजी मुख्यमंत्र्यांसह विविध पदाधिका-यांना इंधन दरवाढ कमी करण्यासाठी पंतप्रधानांवर दबाव आणावा अशा आशयाचं निवेदन दिलं जाणार होतं. मात्र हा मोर्चा अडवल्यामुळे कार्यकर्त्यांनी जोरदार घोषणाबाजी करून रस्ता अडवून धरला.
