अमेरिकेत राहणा-या एका व्यक्तीनं ठाण्यात राहणा-या एका गृहिणीची १९ लाखाहून अधिक रक्कमेची फसवणूक केल्याचा प्रकार उघडकीस आला आहे. या महिलेनं अलिकडेच व्यवसाय सुरू केला होता. या व्यवसायातूनच तिचा अमेरिकेत राहणा-या डेरीक जो याच्याशी संपर्क आला. या महिलेच्या वडीलांचा मित्र असल्याची ओळख डेरीक जो नं दिली. आपण वाईन्सच्या व्यवसायात असल्याचंही त्यानं या महिलेला सांगितलं. सामाजिक संकेतस्थळावरून त्याचा या महिलेशी संपर्क होता. डेरीकनं या महिलेला आपल्याला काही भेट स्वरूपात वस्तू पाठवायच्या असल्याचं या महिलेला सांगितलं. पण या महिलेनं त्याला नकार दिला. तरीही डेरीकनं आग्रह केला आणि आपण पर्स, घड्याळ, लॉकेटस् आणि लॅपटॉप पाठवणार असल्याचं सांगितलं. त्यानुसार २८ ऑगस्टला या महिलेला दिल्लीवरून स्वत:ची सेंट्रल एक्साईजचे असिस्टंट कमिशनर सुमितकुमार असल्याची ओळख दिली. आणि एक पार्सल दिल्लीला आलं असून त्यासाठी ६८ हजार रूपये एक्साईज ड्युटी भरण्यास सांगितली. त्यावेळी या महिलेनं ही ड्युटी भरण्यास नकार दिला असता सुमितकुमारनं तिला अटक करण्याची धमकी दिली. सुमितकुमारच्या धमकीमुळं घाबरून जाऊन तिनं अखेर ६८ हजार रूपये बँकेतून सुमितकुमारच्या अकाऊंटला ट्रान्सफर केले. पण भेटीचं पार्सल मात्र या महिलेला मिळालं नाही. सुमितकुमारनं नंतर तिला वारंवार धमक्या देऊन त्याच्या बँक अकाऊंटला जवळपास १९ लाख रूपये ट्रान्सफर करायला लावले. नंतर या महिलेला आपली फसवणूक झाल्याचं लक्षात आल्यावर तिनं नौपाडा पोलीस ठाण्यात याप्रकरणी तक्रार नोंदवली. नौपाडा पोलीसांनी माहिती तंत्रज्ञान कायद्याखाली गुन्हा नोंदवला असून अधिक तपास सुरू आहे.
