माजी केंद्रीय मंत्री डॉ. सत्यपाल सिंग यांनी काल एका दाव्यात ठाणे न्यायालयात हजेरी लावली. डॉ. सत्यपाल सिंग हे भारतीय जनता पक्षाचे खासदार असून २०१२ मध्ये कायदा आणि सुव्यवस्था विभागाचे विशेष पोलीस महानिरिक्षक असताना एका दरोडा प्रकरणात आरोपींवर मोक्का लावण्यासाठी त्यांनी परवानगी दिली होती. काल या प्रकरणात त्यांची साक्ष झाली. २०१२ मध्ये घडलेल्या दरोड्याच्या प्रकरणात ५ जणांना अटक झाली होती. या पाच जणांनी संघटित गुन्हेगारीद्वारे त्या परिसरात दहशत पसरवली होती. त्यामुळं त्यांच्यावर मोक्काखाली कारवाई करण्यात आली होती. याप्रकरणी काल विशेष मोक्का न्यायालयाचे न्यायाधीश व्ही. वाय. जाधव यांच्या न्यायालयात सत्यपाल सिंग यांची साक्ष नोंदवण्यात आली. या प्रकरणात मोक्का लावताना कायद्यातील सर्व तरतुदींचं पालन केल्याचं सत्यपाल सिंग यांनी न्यायालयासमोर स्पष्ट केलं.
