नवीन कळवा पुलाच्या ठाणे कारागृहाच्या बाजूकडील मार्गिका उद्यापासून वाहतुकीसाठी खुली करण्यात येत असल्याची माहिती महापालिका आयुक्त अभिजीत बांगर यांनी दिली. नवीन कळवा पुलाची ही चौथी मार्गिका वाहतुकीसाठी खुली झाल्यानंतर या ठिकाणी होणारी वाहतूक कोंडीची समस्या सुटणार आहे.
कळवा खाडीवरील नवीन पुलाच्या पोलीस आयुक्तालय कार्यालय ते कळवा चौक, बेलापूर रोडवरील मार्गिका यांचा लोकार्पण सोहळा नुकताच मुख्यमंत्र्यांच्या हस्ते झाला होता त्यावेळी ठाणे कारागृहाजवळील मार्गिका 1 डिसेंबर रोजी सुरू करण्याची घोषणा मुख्यमंत्र्यांनी केली होती. या घोषणेप्रमाणेच ही मार्गिका एक दिवस पूर्वीच म्हणजेच 30 नोव्हेंबरपासून सुरू करण्यात येत आहे. या मार्गिकेचे काम युद्धपातळीवर महापालिकेच्या संबंधित विभागामार्फत पूर्ण करण्यात आले आहे. ठाणे कारागृहाच्या बाजूकडील ही मार्गिका कळवा चौक आणि बेलापूर मार्गावर उतरणार आहे. ही मार्गिका वाहनांसाठी सुरू झाल्यावर ठाणे बाजूकडील चौकामध्ये तसेच कळवा येथील शिवाजी चौक या दोन्ही ठिकाणी होणारी वाहतूक कोंडीची समस्या मोठ्या प्रमाणावर सुटणार आहे.
कळवा पुलावरील चौथ्या मार्गिकेचे काम वेळेत पूर्ण झाले असून ही मार्गिका उद्यापासून सुरू होत आहे. या मार्गिकेमुळे वाहतूक कोंडी मोठ्या प्रमाणावर सुटणार असून वेळेची बचत होणार आहे. कळवा चौक परिसर, ठाण्याहून बेलापूर, नवीमुंबईकडे जाणारी वाहतूक आता सुरळीत होईल. तसेच साकेतकडील मार्गिकेचे कामही युद्ध पातळीवर सुरू असून ही मार्गिका दिनांक 31 मार्च 2023 रोजी सुरू करण्यात येणार आहे असं महापालिका आयुक्तांनी सांगितलं.